Иако Лионел Меси е едно од најпознатите имиња на светот, во неговиот роден град Росарио на децата им е забрането да бидат именувани по презимето на овој успешен фудбалер.
Аргентинските медиуми уште пред 8 години известија за преседанот кога еден навивач успеа на своето новородено дете да му го даде името Меси.
Еден од водечките луѓе на Росарио, на северот на земјата, своевремено предупреди дека е забрането новороденчињата да се нарекуваат Меси, и покрај фактот што човек од југот на Аргентина доби дозвола така да го нарече своето бебе.
Навивачот Ектор Варела издејствувал матичниот регистар на Рио Негро да го прифати името Меси за неговото бебе, кое тогаш било само две недели старо. Мажот побарал посебно одобрение од агенцијата, не знаејќи дека неговиот син ќе биде првата личност во Аргентина која ќе го носи тоа име. Така, неговиот син денес е познат како Меси Варела.
Властите сакале, и покрај преседанот, да се осигураат дека ниеден друг родител нема да крене по стапките на Варела, па директорот на цивилниот регистар на провинцијата Санта Фе, Гонсало Карижо, за Radio 2 Rosario изјави дека „користењето презимиња како имиња е забрането со закон бидејќи може да предизвика забуна“.
Владините проценки покажуваат дека по Мундијалот 2014 година во Бразил 2 од 10 родени деца добиле име според некој играч од репрезентацијата на Аргентина, а листата ја предводат имињата Лионел (или Леонел), Анхел, Гонсало, Серхио и Хавиер. Тогаш Аргентина не го освои пехарот откако со 1:0 загуби од Германија во финалето.