Веќе една недела, американската полиција трага по избеган затвореник и затворска чуварка од Алабама, која очигледно му помогнала во бегството, пренесе BBC.
Во соопштение на полицијата, тие двајца имале посебен однос и за тоа сведочат и други затвореници. Кејси Вајт е осомничен за убиство, а ако биде осуден му се заканува смртна казна. Според обвинителот Крис Коноли, затворската чуварка Вики Вајт важела за една од најдобрите вработени, па затоа целата ситуација за сите е шокантна.
Иако имаат исто презиме, затвореникот и затворската чуварка не се во роднинска врска.
За последен пат биле видени во петокот наутро, во канцеларијата на шерифот на округот Лодердејл во Алабама. Вајт рекла дека го носи затвореникот во суд, на проценка на менталното здравје, но подоцна нејзините колеги сфатиле дека тоа воопшто не било закажано.
Канцеларијата на Маршалот на САД нуди награда од 10.000 долари за информации што би довеле до апсење на Кејси Вајт и лоцирање на Вики Вајт.
Затворската чуварка и затвореникот исчезнале во петокот, кога требало да биде нејзин последен ден на работа. Неодамна ја продала куќата и на колегите им рекла дека планира повеќе време да мине на плажа. Полицијата сега верува дека Вики помогнала во организирање на бегството откако го прекршила протоколот и сама го однела затвореникот до судот.
