Volkswagen сериозно размислува за драстичен деловен потег, преселувајќи го целото производство на автомобили од Германија.
За сè е виновен гасот, односно недостигот на гас предизвикан од актуелната политичка ситуација во која продолжува војната во Украина, а санкциите кон Русија никогаш не биле построги. Доколку ова сценарио се прелее во следната година, Volkswagen би можел лесно да направи таков драстичен потег.
Преместувањето на производството од матичната земја е само едно од решенијата за кои моментално се разговара во Волфсбург. Доколку се донесе таква одлука, Volkswagen би го префрлил целото производство од Источна Европа и Германија во фабрики на Запад, пред се во Белгија, Португалија и Шпанија, дознава Bloomberg.
Русија и Северен поток 1 се главниот извор на гас за германската индустрија, односно беа додека Русите не го свртеа вентилот. Индустријата веќе сносува одредени последици. Се проценува дека најсериозните проблеми ќе излезат на површина доколку гасот не протече до јуни следната година, велат од Volkswagen.
„Како среднорочно решение, фокусирани сме на поголема локализација, преместување на производството или технолошки алтернативи, истата воспоставена практика што се применуваше и на предизвиците поврзани со недостиг на полупроводници, како и во случај на други проблеми со снабдувањето.“
Volkswagen тврди дека ќе може да го задржи производството во следните шест месеци, но под услов Германија да продолжи да ги пополнува своите резерви, кои сега се на 90 проценти. Бидејќи е можно резервите да се намалат во зима, Volkswagen веќе работи на намалување на потрошувачката на гас во согласност со барањата на германската влада за намалување од 20 проценти.
Bloomberg нагласува дека Volkswagen е загрижен поради поскапувањето на енергенсите, со што кооперантите сè потешко се справуваат. Затоа, постои опасност многу кооперанти да бидат принудени да го прекинат производството.