Врз патниците на авионот Airbus A330-300 на Delta Air Lines од Амстердам до Детроит во вторникот паѓале црви.
Наводно, еден од патниците во рачниот багаж носел расипана риба и ја ставил во преградата над главите на патниците. За време на летот, црвите почнале да паѓаат врз патниците што седеле долу, пишува Independent.
Филип Схот, Холанѓанец кој живее во Ајова, изјави за Fox 2 дека видел десетици црви како паѓаат врз патниците за време на летот.
„Навистина не знам што ми се вртеше низ главата. Се обидував да го обработам тоа. Одвратно“, рече Схот.
Вели дека стјуардесите пронашле торба од која испаѓале црви. Во неа нашле риба завиткана во весник. Пилотот тогаш најавил дека летот нема да продолжи туку авионот ќе се врати на аеродромот „Схипол“ кај Амстердам.
Delta им се извини на патниците.
„Нивното патување беше прекинато поради неправилно спакуван багаж. Авионот се врати, а патниците беа прераспределени на следниот достапен лет. Авионот беше тргнат од употреба заради чистење“, соопшти авиокомпанијата.
