Според Washington Post американскиот претседател Донал Трамп му открил „строго доверливи информации“ поврзани со Исламската држава на рускиот шеф на дипломатијата, Сергеј Лавров. Преку споделувањето на овие чувствителни информации тој директно го загрозил животот на извор на разузнавачки информации.
Информациите кои ги добиле Лавров и рускиот амбасадор во САД, Сергеј Кисљак, пристигнале од американски партнер преку „многу чувствителен договор за размена на разузнавачки информации“.
„Партнерот во договорот не дал дозвола САД да споделуваат информации со Русија, а функционерите изјавиле дека одлуката на Трамп да го направи тоа претставува ризик за идната соработка на сојузникот, кој има пристап до внатрешните кругови на Исламската држава“, пишува Washington Post.
По средбата на американскиот претседател и Лавров, еден од повисокорангираните функционери на Белата куќа презел чекор да ја намали штетата и се советувал со ЦИА и НСА. Според американскиот весник, од ЦИА одбиле да дадат коментар, додека од НСА не дозволиле да им се обратат со прашање.