Alpina ќе го понуди лимитираниот модел B5 GT во двете каросериски верзии, а основната цена во Германија е 145.500 евра за Sedan и 148.500 за Wagon.
Неодамна, под покровителство на BMW, познатата германска тјунинг компанија Alpina претстави модел со ограничена едиција што се крие зад ознаката B5 GT, базиран е на серијата 5 на BMW и со себе го носи најмоќниот мотор досега што е „растурен, доработен и составен“ во Alpina.
Компанијата од Баварија ќе го понуди B5 GT во двете каросериски верзии и тоа во само 250 примероци, а купувачите кои се подготвени да потрошат најмалку 145.500 евра може да сметаат на 4,4-литарски V8 битурбо мотор кој развива 634 КС и 850 Nm максимален вртежен момент.
Наведените бројки се доволни за B5 GT Sedan да од 0 до 100 км/ч стигне за 3,4 секунди и да развие 330 км/ч, додека попрактичната караван верзија ќе достигне 100 км/ч за 3,6 секунди и ќе развива 322 км/ч. Преносот на моќноста на двете оски (xDrive) се управува со рафиниран 8-брзински автоматски менувач, а ефикасното запирање е обезбедено со сопирачките на Brembo, видливи под добро познатите 20-инчни Classic бандажи на Alpina.
Покрај познатите нијанси на сина и зелена, Alpina ќе понуди уште шест бои на каросеријата со B5 GT, а има и неколку комбинации на бои во кожена и дрвена внатрешност, која е украсена со табличка со сериски број и препознатливи Alpina амблеми.
Книгата за нарачки е отворена, а првите испораки се планирани за јули.
