Задолжителен Ковид тест за тие што се враќаат во Германија

Германскиот министер за здравство Јенс Шпан изјави дека ќе биде воведено задолжително тестирање за сите патници кои се враќаат во Германија од високоризичните области.

– Сакаме добро да се искоординираме со сите германски покраини, кои мораат да воведат задолжително тестирање на аеродромите и железничките станици, посочи Шпан.

Тој додаде дека задолжителното тестирање ќе почне во текот на неделата.

Кон крајот на јули, Амбасадата на Република Косово во Берлин соопшти дека, според податоците кои ги објави Институтот „Роберт Кох“, најголемиот број од заразените со COVID-19, кои влегуваат во Германија се лица кои се враќаат од Косово.

Во објава на својата страница на Facebook, косовското дипломатско претставништво во Германија ги повикува косовските граѓани кои се со престој во таа земја, а ги поминуваат годишните одмори во татковината, да ги почитуваат препораките на Националниот институт за јавно здравство на Косово за држење дистанца, носење маски и одржување на хигиената.