Премиерот Зоран Заев смета дека од оградата на владата може да се направат клупи за седење и натстрешници.
„Одлуките за оградата на Владата и за мебелот ќе ги носиме соодветно на нашите согледувања. Мораме да видиме што значи согласно Законот за јавни набавки отстранување порти или огради. Од бетонските столпчиња може да се направат убави клупи за седење, а металните огради да бидат добар покривач на клупите, но да видиме што ќе кажат архитектите и инженерите“, изјави Заев пред почетокот на конференцијата „Жени во енергетика“, која денеска се одржува во Скопје.
Целта на овој потег е околу владината зграда да се отвори просторот кој ќе биде слободен за движење на граѓаните, а премиерот веќе побара портите да бидат постојано отворени сè додека не се отстрани оградата.