Шампионот на Англија и Европа, Манчестер Сити, го договори датумот за „судењето на векот“ во светот на фудбалот, како што го нарекоа британските медиуми.
Сити ќе се најде на суд поради прекршување на 115 правила од финансискиот фер-плеј (ФФП). Обвиненијата беа покренати во февруари, а по континуираните дискусии меѓу адвокатите на Манчестер Сити и челниците на Премиер лигата, беше договорен датумот на судењето.
Како што пренесуваат британските медиуми, судењето ќе започне на почетокот на следната сезона, односно есента 2024 година. Точниот датум на почетокот на судењето се чува во тајност, а ќе биде и зад затворени врати.
Актуелниот шампион на Европа е обвинет за прекршување на 115 правила од сезоната 2009/2010, кога започна неверојатниот напредок на клубот, кој стана најдоминантна сила во англискиот фудбал, но и во Европа.
Доколку биде прогласен за виновен за наведените прекршоци, Сити ќе се соочи со одземање на бодови, а во краен случај можно е дури и да биде исфрлен од лигата или да му се одземат некои трофеи, што е помалку очекувано.
Менаџерот Жузеп Гуардиола пред неколку дена на прес-конференција изјави дека најверојатно ќе раководи со Манчестер Сити дури и ако испаднат во третото по ранг натпреварување.
Да потсетиме, пред две недели Премиер лигата жестоко го казни Евертон и му одзема 10 бода поради кршење на финансискиот фер-плеј. Навивачите на овој клуб збеснаа што Сити не беше казнет, кој е многу поголем трошач на пари од Евертон.
Истовремено, од City Football Group наведуваат дека очекуваат позитивни резултати по судењето наесен следната година.