Посетата на претседателот на Соединетите Американски Држави, Џо Бајден, на Киев не можеше да помине без коментар од Кремљ, кој како и обично беше многу остар.
„Ова е само една лоша претстава на провинциски театар“, изјави Марија Захарова, портпаролка на Министерството за надворешни работи на Русија.
„Криминолозите и психолозите се согласуваат во едно: криминалецот секогаш го привлекува местото на злосторството! Белата куќа се потруди на светот да му ја покаже својата верба во успехот на режимот на Зеленски, нејзината намера да му помогне до победничкиот крај. Во реалноста сè наликуваше на лоша претстава на паланечки театар, осудена на пропаст, за очигледно да се додаде малку драма“, вели секогаш острата Захарова.
Таа посочи и дека политичката волја на Западот и Киев е неопходна за мир во украинскиот конфликт, но дека Москва засега едноставно не го гледа тоа.
„За мир што е можно поскоро, потребна е политичка волја на Западот, доколку некој сè уште не ја сфатил и неговите штитеници од Киев. Не го гледаме тоа во овој момент“, рече таа.
Да потсетиме, американскиот претседател во понеделникот во голема тајност беше во ненајавена посета на Киев.
Спротивно на воспоставената практика, американската администрација не ја информираше јавноста за посетата, а претставниците на Белата куќа постојано негираа дека претседателот планира да замине во Украина.
Во понеделникот САД ветија нов пакет помош за Киев во вредност од 460 милиони долари.
