Потпретседателот на Интер и клупска легенда, Хавиер Занети, вели дека сака да го избегне Реал Мадрид во финалето оти му се чини дека Лигата на шампионите премногу му лежи на шпанскиот клуб.
Откако Интер синоќа го завери својот билет за финалето кое на 10 јуни ќе се игра во Истанбул, „Нераѕурите“ вечерва мирно ќе го гледаат реваншот помеѓу Манчестер Сити и Реал Мадрид и ќе го дознаат својот последен противник на патот кон драгоцениот пехар.
Иако повеќето се плашат од силниот и пребогат Манчестер Сити, Занети, пак, сака да го избегне шпанскиот кралски клуб.
„Би сакал да го избегнеме Реал Мадрид затоа што ова натпреварување се чини како создадено за нив. Сепак, најважното е што дојдовме до тука. Патот беше тежок, не е лесно да се игра дерби во полуфинале. Јас играв и загубив во 2003 година“, рече Занети во изјава за Sky Sport Italia. Таа сезона Интер и Милан исто така беа во полуфиналето, а натпреварите заврпија 0:0 и 1:1, но Милан отпатува во финалето оти тогаш важеше правилото за гол на гости, што во овој случај беше еден голем парадокс бидејќи двата тима всушност играат на ист стадион. Милан потоа ја освои тутулата.
Сонародникот на Занети, Аргентинецот Лаутаро Мартинес синоќа беше творец на втората победа на Интер во двомечот со лутиот градски ривал Милан.
„Многу сум среќен за него. Секоја година кај нас се подобрува. Тој е референтна точка за тимот и си го чуваме затоа што е премногу важен. Засега останува тука, потоа ќе видиме. Ајде да уживаме во победава. Среќен е овде, каде што си го пронајде домот. Среќен е во Милано и се надевам дека тоа ќе трае долго“.
Пред почетокот на сезоната Интер беше прежален откако беше извлечен во „групата на смртта“ заедно со гигантите Баерн и Барселона, плус чешка Викторија. Заврши втор зад тимот од Баварија откако во меѓусебните пресметки беше подобар од Каталонците. Потоа во нокаут-фазата ги исфрли Порто, Бенфика и сега Милан, а успеа на 5 натпревари да не прими гол, или вкупно 8 со оние од групата.
„Беше тешко, но постигнавме нешто неверојатно. Пофалбите одат кај тимот и тренерот, кои успеаја да реагираат во тешките моменти. Инѕаги не зборуваше многу, само докажа дека е вреден за финале“, заврши Занети.
