Република Северна Македонија ќе добие 800.000 вакцини против COVID-19 од производителот Pfizer, од кои првите 5.850 дози ќе пристигнат во февруари, информира Министерството за здравство.
„Министерот за здравство д-р Венко Филипче, во директни преговори со овој производител, обезбеди вакцини за цела 2021 година. Договорот беше дефиниран утрово во телефонски разговор на министерот Филипче и висок претставник на компанијата производител на вакцини против COVID-19. Првите 5.850 дози вакцини на Pfizer ќе стигнат во февруари, потоа ќе следува пратка со поголема количина во март, април, а динамиката за цела 2021 година дополнително ќе се утврди, соопшти утрово Министерството за здравство.
Нашата земја, се додава во соопштението, навремено почна со подготовките за вакцинација против COVID-19 и постојната функционална и одлично поставена здравствена инфраструктура каде досега се врши вакцинација за други болести, е подготвена за имунизација против корона.
Вакцината на Pfizer се чува во фрижидери на -70 степени Целзиусови, а таквите фрижидери во нашата земја ќе пристигнат месецов.
Регулаторните медицински агенции европската ЕМА и американската ФДА имаат дадено одобрение за вакцината на Pfizer.