Вредноста на турската лира падна за речиси 4% на 4,7488 лири за еден долар откако претседателот Реџеп Тајип Ердоган го назначи неговиот зет за министер за финансии.
За аналитичарите не е спорно само влегувањето на претседателскиот зет во првата турска влада по промената на политичкиот систем од парламентарен во претседателски.
Нив ги загрижува и исклучувањето на двајца министри кои имаат добри односи со инвеститорите во финансиските центри како Лондон и Њујорк. Се работи за сега веќе поранешниот министер за финансии и досегашниот вицепремиер.
„Ова воопшто не го очекувавме. Берзата беше во исчекување на именувањето на владата, а сигналот е јасен – ова не е проберзанска, туку проедоганова влада“, коментира Нора Нојтебом, аналитичарка на холандската банка ABN Amro.
Јавните финансии на Турција сега се во рацете на 40-годишниот Берат Албајрак кој во 2004 година се ожени со ќерката на Ердоган.
Неговото назначување за министер за финансии го активираше алармот кај странските аналитичари кои сметаат дека тоа е само чекор понатаму кон влошување на независноста на монетарната политика и општата состојба на турското стопанство.
Ердоган веќе ги потврди сомнежите дека централната банка нема да може да прави потези спротивни на неговиот став.
Тој потпиша уредба со која ги присвојува овластувањата за именување на гувернер на централната банка и негови заменици, а мандатот им го скратува од пет на четири години.
