Австралиската актерка Кејт Бланшет, која беше претседателка на жирито на овогодинешниот Кански филмски фестивал, беше на чело на протестот наречен „Let’s Climb“ на кој учествуваа 82 жени од филмскиот свет.
Во заедничкиот протест се обединија актерки, сценаристки, режисерки и останати филмски работнички. Hollywood Reporter пишува дека бројот 82 е значаен, бидејќи го симболизира бројот на жени режисерки кои учествуваа на фестивалот во текот на неговото 71-годишно постоење.
„На овие скалила денес стојат 82 жени. Тоа е симболичен број кој го означува бројот на жени кои се качија тука откако Канскиот фестивал беше за првпат одржан во 1946 година. Во истиот тој период на овие скалила се качија 1.688 мажи режисери. Тие факти се силни и неоспорливи. Жените не се малцинство во светот, а сепак состојбата во нашата индустрија вели поинаку. Ние жените се соочуваме со тие предизвици, но денес стоиме на овие скалила како симбол за нашата одлучност и посветеност за напредок“, прочитаа Кејт Бланшет и Агнес Варда во заедничкото соопштение.
Со овој гест повторно беше истакнат проблемот со нееднаквост за жените во повеќе индустрии. Тие нагласија дека, помеѓу останатото, очекуваат да бидат подеднакво платени за истата работа и дека очекуваат сите работнички пред и зад камерата ќе бидат еднакви со машките колеги.
„Скалилата од нашата филмска индустрија мораат да им бидат достапни на сите. Да се качиме сите по нив“, порачаа на крајот.