Поранешниот француски виртуоз, а сега докажан тренер, Зинедин Зидан, по крајот од сезоната ќе седне на клупата на ПСЖ, пренесуваат неколку шпански медиуми.
Медиумите од Пиринеите тврдат дека сегашниот тренер Кристоф Галтје ќе ја заврши сезоната по што ќе добие отказ, а неговото место ќе го преземе Зидан.
„Постојат два клуба кои се опции за Зидан. Колку и да звучи изненадувачки, едниот е Реал. Зидан има одличен однос со претседателот на Реал, Флорентино Перес. Другиот клуб кој е заинтересиран за Зидан е ПСЖ. Зидан минатоито лето веќе преговараше со ПСЖ“, пишува Mundo Deportivo.
Шпанските медиуми наведуваат дека постојат поголеми шанси познатиот француски тренер да го преземе ПСЖ отколку да се врати во Реал. Исто така, потсетуваат дека Зидан очекувал дека по Мундијалот во Катар ќе стане селектор на Франција, но Дидје Дешан го продолжи договорот со Фудбалската федерација на Франција (ФФФ).
Mundo Deportivo наведува дека евентуалното доаѓање на Зидан во ПСЖ ќе донесе бројни промени во тимот кој е актуелен шампион на Франција, а неговиот прв потег би бил продажба на Нејмар во друг клуб.
Зидан, кој има 50 години, во два наврата беше тренер на Реал - од 2016 до 2018 и од 2019 до 2021 година. Со мадридскиот клуб освои вкупно 11 трофеи.
