Реал Мадрид и Ливерпул ќе го одиграат првиот натпревар од четвртфиналето на Лигата на шампиони во Мадрид во вторник од 21 часот.
Натпреварот ќе се игра на заменскиот стадион на Реал, Алфредо ди Стефано.
Тренерот на Реал, Зинедин Зидан најави соочување со Англичаните.
„Мислам дека сме потценети и дека без причина се нема доверба во нас. Овој тим никогаш не се предава“, рече Французинот.
Зидан го пофали Јирген Клоп, менаџерот на Ливерпул.
„Тој е фантастичен тренер. Тренер е подолго време и има големо искуство. Навистина заврши одлична работа во својата тренерска кариера. Сум видел многу различни тренери и работи од кога сум во овој бизнис“.
Најслабиот дел на Ливерпул е одбраната, на која сè уште ѝ недостасува Вирхил ван Дајк.
„Не знам дали можеме тоа да го наречеме слабост. Имаат и други играчи. Имаме и ние неколку играчи кои ни фалат, но нашата сила е во тимската игра. Без оглед кој недостасува, важни се тимот и заедништвото. Не гледам хендикеп во тоа што на едниот или на другиот тим му фали некој играч“.
Го прашаа и за состојбата на често повредениот Еден Азар.
„Мора да мирува. Не ризикуваме враќање на некој играч ако не е подготвен. Одиме чекор по чекор".
