„Росонерите“ одлучија целата пауза од 15 минути да ја минат крај аут-линијата на стадионот „Ренато Дал'Ара“ наместо да влезат во соблекувалните.
Милан имаше водство од два гола на полувремето против Болоња на гости благодарение на головите на Оливје Жиру и Кристијан Пулишиќ. Кога главниот судија Лука Паирето свирна крај на првиот дел, домашните заминаа во подтрибинскиот простор во соблекувалните, но играчите на Милан не ги следеа - тие останаа на теренот, крај аут-линијата.
Стефано Пиоли својот полувремен говор го држеше таму, на отворено. Иако ова е многу необично, Милан не прекрши никакво правило бидејќи не постои правило што вели дека на пауза мора да се замине во соблекувална. Тоа се случува и на онаа мини пауза пред двете продолженија од по 15 минути, како и пред пенал-рулет.
Според DAZN, одлуката била на Пиоли и на неговиот стручен штаб. Тие биле незадоволни од климатизацијата на соблекувалната, се жалеле дека слабо ладела на жешката вечер во Болоња.
Поради висопките температури сите натпревари од првите две кола во Серија А се играат во термините од 18:30 и 20:45 часот. Италија летово е погодена од екстремни температури, како во јули, така и сега во август.