Јадењето не треба да биде математички проблем, туку уживање и начин да водите здрав живот.
Нутриционистката Мишел Меј вели дека не треба да броите калории за да ослабите и објаснува на што треба да се фокусирате во напорите за намалување килограми.
„Не може да ги етикетираме намирниците само како добри или лоши, бидејќи ниту една храна не е само добра или лоша. Меѓутоа, тоа не нѐ спречува да ги проценуваме врз основа на тоа колку калории имаат“, вели Меј.
Кога некоја храна ја отфрламе како лоша врз основа на тоа колку калории има или колку шеќер содржи, се трудиме да ја одбегнуваме во исхраната.
„Поради тоа почнуваме да чувствуваме недостиг во органзмот, а тоа подоцна води до прејадување“, вели таа.
Нискокалорични грицки
Кога луѓето решаваат да слабеат, почнуваат да купуваат нискокалорична храна и грицки, што според Меј води кон исхрана што не содржи доволн хранливи состојки. Така јадете цел ден, а пак сте гладни.
Очигледно, не е паметно постојано нешто да грицкате ако сакате да слабеете, па дури и кога се во прашање грицки со малку калории.
„Проблемот е што оваа храна не ви помага да се ослободите од навиката да јадете и кога не сте гладни, а тоа е најчестиот проблем на луѓето со вишок килограми“, вели Меј.
Таа советува наместо да се преоптеретувате со бројот на калории, да јадете само кога сте гладни, без разлика колку калории ќе има тој оброк.
Заборавате да уживате во храната
Броењето калории го претвора јадењето во математички проблем, а јадењето е всушност комплексна психолошка, социјална и физичка активност. Броењето калории, мерењето порции и слично прават „да бидеме добри“, наместо да се чувствуваме добро.
Кога постојано сметате колку калории внесувате во оброкот, тоа ве спречува да уживате во храната и јадењето ви создава чувство на вина. Тоа ве оддалечува од главното сознание: храната е гориво за вашето тело и душа. Ако сте незадоволни и под стрес, тоа само ќе придонесе за зголемување на бројот на килограми, вели Меј.
Потребата за калории е различна
Броењето калории со цел да внесеме одреден број секој ден не е добар метод бидејќи телото нема исти потреби секој ден.
„Секој ден е различен и глупаво е да мислиме дека секој ден ни е потребен ист број на калории. Има денови кога сме поактивни, кога хормонските промени делуваат на апетитот, како и денови кога едноставно не ви се јаде. Најважно е да внимавате кога сте навистина гладни, а кога само јадете од досада или нервоза“, вели таа.