Премногу шеќер може да доведе до дебелеење, да предизвика кариес како и да го зголеми ризикот од дијабетес. Но, има и еден сериозен ефект, го нарушува вашиот сон така што несоницата ќе ве остави да копнеете по уште шеќер.
Истражување од 2016 година покажа дека луѓето кои консумираат големи количини шеќер имаат тенденција да не спијат длабоко и да покажат поголем немир навечер, а често страдаат и од несоница која може да стане хроничен проблем.
Благото создава енергија и го нарушува сонот
Според клиничкиот психолог Мајк Бреус, специјалист за нарушување во спиењето, премногу шеќер доведува до склоност да се јаде подоцна во текот на денот бидејќи нивото на шеќер во крвта излегува од контрола. Ова негативно влијае на сонот, а вашиот нарушен сон за возврат ќе предизвика уште поголема желба за шеќер.
Тоа наликува на маѓепсан круг.
„Премногу шеќер навечер може да биде штетен по здравјето. Кога ќе изедете нешто благо, нивото на шеќер во крвта расте, а панкреасот ослободува инсулин кој помага шеќерот да се врати во клетките, давајќи им гориво за работа.
Консумирањето шеќер доцна навечер премногу ве стимулира, дава енергија и ве подготвува за активности, но тоа не е она што се обидуваме да го правиме навечер“, објаснува нутриционистот Алекс Еванс.
Според д-р Пол Кели, разумна е тезата дека постои врска меѓу високото внесување шеќери и нарушување во спиењето, но предупредува дека се потребни повеќе податоци пред ова во целост да се дефинира како правило.
Несоницата и желбата за благо се тесно поврзани
„Лошиот сон и консумирањето шеќери или масна храна одат заедно, но постојат докази дека тоа не е секогаш така. Дали јадеме благо за помалку да спиеме или помалку сон нѐ тера да јадеме благо?“, вели Кели.
На просечна возрасна личност потребни се најмалку 7 часа сон навечер. Ако спие помалку, телото ќе бара извори за краткорочно зголемување на енергија, а комбинацијата од лоша исхрана и лош сон штетат на здравјето.
Основно правило е да не јадете два часа пред спиење.
