Омикрон полесно го избегнува имунитетот на домаќинот отколку делта варијантата на коронавирусот, што исто така објаснува зошто се шири побрзо, според една данска студија објавена минатата недела.
Откако омикрон сојот беше откриен во ноември, научниците брзаат да откријат дали предизвикува поблаги симптоми на болеста и зошто изгледа позаразно од делта.
Постојат различни причини зошто вирусот може полесно да се пренесе. На пример, колку долго останува во воздухот, колку долго е способен да се залепи за клетките и колку добро го избегнува имунолошкиот систем на домаќинот.
Истражувањето предводено од научници од Универзитетот за статистика во Копенхаген и серолошкиот институт Statens Serum Institute (SSI) сугерира дека главната причина за побрзото ширење на оваа варијанта на вирусот е неговата способност да го избегне имунитетот добиен од вакцината.
„Нашите наоди потврдуваат дека брзото ширење на омикрон може да се припише на способноста да се заобиколи имунитетот, наместо на инхерентното зголемување на преносливоста“, велат истражувачите.
Данските научници претходно заклучија дека кај вакцинираната популација, омикронот е помеѓу 2,7 и 3,7 пати позаразен од делта.
Студијата исто така покажа дека, без оглед на варијантата на вирусот, оние кои биле вакцинирани со третата доза имале помала веројатност да го пренесат вирусот отколку оние кои не биле вакцинирани.
Иако полесно се пренесува, омикронот предизвикува поблага форма на болеста, изјави за медиумите Тајра Гроув Краузе, технички директор на SSI.
Таа додаде дека ризикот од хоспитализација поради омикрон е за половина помал отколку кога станува збор за делта, но поради поголемиот број заразени, здравствените системи сѐ уште се под притисок.
Слични податоци се појавуваат и во други студии за омикрон.