По експлозијата во производството на леб од кисело тесто за време на пандемијата, природно квасираниот леб останува омилен и со добра причина.
Киселото тесто се смета за суперхрана и поздрава опција во споредба со обичниот леб. Најдолговечното семејство на светот го консумира секој ден со ручек. Зошто? Дали киселото тесто е поздраво од обичното? Дали има некакви здравствени придобивки?
Што е леб од кисело тесто?
Обичниот леб се прави со комерцијален или пекарски квасец кој се меша со вода, брашно, сол и шеќер за да се активира. Потоа се меша во тестото и се пече. Лебот од кисело тесто (sourdough) се прави со стартер, направен од свежо брашно и вода, кој содржи див квасец и живи бактерии наместо пекарски квасец.
„Стартерот се остава во тегла да се ферментира, што може да потрае до седум дена или подолго. Процесот на ферментација создава јаглерод диоксид кој природно го подига лебот“, објаснува научникот за храна, Шарлин Ван Бујтен.
Колку е хранлив лебот од кисело тесто?
Едно средно парче леб од кисело тесто (50 грама) содржи приближно:
130 калории
4 грама протеини
1 грам масти
25 грама јаглехидрати
1 грам влакна
помалку од 1 грам шеќер
200-300 милиграми натриум.
Лебот од кисело тесто обезбедува витамини и минерали, вклучувајќи витамин Б, железо и калциум и е одличен извор на антиоксиданси и пребиотици, забележуваат експертите.
Дали киселото тесто е поздраво од обичното?
Лебот од кисело тесто има здравствени придобивки кои обичниот леб можеби ги нема. Ќе наведеме некои.
- има повеќе хранливи материи
- го зголемува шеќерот во крвта побавно
- полесно се вари
- го поддржува здравјето на цревата.
„Типот на брашно што се користи може да влијае на хранливата содржина на лебот со кисело тесто, но генерално земено, лебот од кисело тесто е здрава опција и може да се јаде редовно како дел од хранлива, урамнотежена исхрана“, забележува доцентот за наука за храна, д-р Џозефина Ви.
Влијание врз слабеењето
Киселото тесто, исто така, содржи повисоки нивоа на отпорен скроб, јаглехидрат на кој му треба многу повеќе време за да се разгради, а што може да помогне во контролата на гладот и тежината.
Отпорност на мувла
Друга предност на процесот на ферментација на кисело тесто лежи во фактот што киселините произведени од бактериите ја намалуваат pH вредноста на лебот, што го спречува растот на патогени од храната, според Американското здружение за микробиологија. Лебот со квас има потенцијал да остане свеж подолго на полиците и да биде поотпорен на мувла.
Помалку глутен за полесно варење
„Глутенот, протеин кој природно се наоѓа во пченицата, јачменот и 'ржта, се разградува за време на процесот на ферментација за правење леб од квасец, па природно содржи помалку глутен од другите видови леб“, забележува Ван Бујтен.
Како резултат на тоа, лебот со квас може полесно да се вари, особено за луѓето кои се чувствителни или нетолерантни на глутен. Сепак, лебот од кисело тесто не е без глутен, па луѓето со целијачна болест или алергија на глутен треба да го избегнуваат.
