Германскиот тенисер Александар Зверев заработи тешка повреда на десната нога вчера на дуелот против Рафаел Надал во полуфиналето на Ролан Гарос.
Натпреварот беше прекинат по три часа игра при резултат 7:6, 6:6 за Надал бидејќи Германецот при еден удар се обиде да се „лизне“ на земјена подлога на стадионот во Париз, но ногата му се „закопа“ по што падна и се фати за зглобот на десната нога.
Ситуацијата беше толку сериозна што тој во солзи го напушти теренот во инвалидска количка, а од комплексот на Ролан Гарос излезе со патерици и со имобилизирана десна нога.
Зверев доцна синоќа по полноќ објави стори на Instagram, а според него ситуацијата е многу сериозна.
„Ова е многу тежок момент за мене. Беше фантастичен натпревар до она што се случи. Се чини дека повредата е сериозна, лекарите ќе направат повеќе тестови и за сè ќе ве информирам кога ќе дознаам повеќе информации“, соопшти Зверев.
„Му честитам на Надал за влезот во 14. финале на Ролан Гарос и се надевам дека ќе го освои и ќе продолжи да пишува историја.“
Зверев и покрај тоа што важи за еден од најдобрите тенисери во светот и моментално е третопласиран на АТП листата, уште нема освоено Грен слем турнир во кариерата. Најблиску до тоа беше во 2020 година кога играше во финалето на УС Опен, но беше поразен од Доминик Тием.