Легендата на Атлетик сонува да го подигне трофејот од Копа дел Реј на крајот од сезоната која му е последна во кариерата.
Ариц Адуриз е вистинска баскиска легенда. Вчера наполни 39 години, а најголемиот дел од кариерата го мина во својот матичен клуб, Атлетик од Билбао.
Голови има еден куп, но она што му недостасува на Адуриз се трофеите. Има само еден, од 2015 кога со Атлетик го освои Суперкупот на Шпанија. Тогаш неговиот тим ја преслуша Барселона понижувајќи ја со 4:0, а токму Адуриз постигна хет-трик.
Откако го загуби финалето во Копа дел Реј во сезоната 2014/15 од Барселона со 1:3, Ариц сега повторно има шанса да дојде блиску до тој куп трофеј. Атлетик е во полуфиналето, а пречката е Гранада, со која вечерва од 21 часот го игра првиот натпревар.
„За ова сонувам одамна. На почетокот беше само фантазија, но сега може да стане многу пореално иако сѐ уште е тешко. Дај Боже да дојдеме уште поблиску, ќе се бориме за тоа. Замислете на крајот на сезонава да се пензионирам со титула. Тоа е сечиј сон“, вели Ариц.
Адуриз во репрезентацијата на Шпанија ретко добиваше шанса. Настапи само 13 пати, а постигна 2 гола и тоа вториот во победата од 4:0 против Македонија во квалификациите за Мундијалот 2018. Затоа, пак, играше и за непризнаената репрезентација на Баскија, неговата родна земја за која на 13 натпревари постигна 12 гола.
„Некако ни е смачено да гледаме како Барса и Реал освојуваат сѐ, да ми извинат. Убаво е да се гледаат првенства каде има повеќе динамика, како што е во Англија. Победата над Барса беше врв. Замислете само како е да се постигне гол во последната минута, а наградата за тоа е полуфинале...“, вели Адуриз.
Од целиот тим на Атлетик, само тој бил роден кога клубот последен пат триумфирал во купот, во 1984 година. Тогаш имал 3 години.