Многу фанови на Михаел Шумахер (54) со години се прашуваат за неговото здравје, но сепак речиси ништо не се знае за здравјето на легендата на Формула 1. Неговиот адвокат објасни зошто е тоа така.
Феликс Дам за магазинот Legal Tribute Online изјави дека имало можност да обелоденат сè, но на крајот сфатиле дека тоа нема да биде добро решение.
„Секогаш се работеше за заштита на приватните работи. Се разбира, разговаравме многу за тоа како тоа е можно. Всушност, имаше идеја да се објави конечен извештај за здравјето на Шуми, но тоа не се случи поради одредена причина“, рече Дам, па дообјасни.
„Не би завршило тука и извештаите за неговата состојба ќе мораше постојано да се ажурираат. Медиумите можеше одново и одново да пишуваат за тоа и да прашуваат: ‘А како изгледа сега?’. Еден, два, три месеци или една година. Тогаш би било тешко да се преземат мерки против таквото пишување“, објасни Дам, кој го следи Михаел Шумахер како адвокат од 2008 година.
Да потсетиме, седумкратниот светски шампион се повреди на 29 декември 2013 година додека скијаше на француските Алпи, удирајќи со главата во карпа. Иако носел скијачка кацига, се здоби со тешки повреди на главата и беше пренесен во болницата во Гренобл каде беше опериран и ставен во индуцирана кома.
Во овие речиси десет години имаше безброј шпекулации поврзани со здравствената состојба на легендарниот Германец, но многу од нив за многу кратко време беа демантирани од неговото семејство и менаџерот.
