Maкедонскиот фудбалер Езџан Алиоски покажа солидарност со граѓаните на Албанија каде вчера имаше разорен земјотрес од 6,4 степени по Рихтер.
Нашиот репрезентативец пред вчерашниот натпревар на Лидс со Рединг ја „презеде“ камерата на клупската телевизија и откако прво се пошегува со соиграчите и го бодреше тимот, ја искористи приликата да укаже на катастрофата и да упати порака за помош.
„ Сериозно, молете се за Албанија. Се надевам Бог ќе им помогне“, рече Алиоски во видеопораката објавена на официјалниот Twitter профил на Лидс.
Во вчерашниот силен земјотрес загинаа најмалку 29 лица, а 650 се повредени. Илјадници луѓе ноќта ја минаа на фудбалскиот стадион во Драч, каде војската постави шатори.
Владата на Албанија денешниот ден го прогласи за Ден на жалост, при што знамињата на сите институции во Албанија се спуштени на половина копје, а училиштата затворени.
