Американскиот Сенат вчера усвои нацрт-закон со кој се заштитуваат истополовите бракови низ САД, мерка што доаѓа како одговор на загриженоста дека Врховниот суд може да ја поништи одлуката од 2015 година со која се легализирани истополовите бракови на национално ниво.
Нацрт-законот, со кој се бара од федералната влада да го признае бракот доколку е легален во државата каде што бил склопен, треба да биде заштитен механизам доколку Врховниот суд пресуди против истополовите бракови.
Мерката нема да им забрани на државите да блокираат истополови или меѓурасни бракови доколку Врховниот суд им го дозволи тоа.
„Денес, долгиот, но неуморен марш кон поголема еднаквост оди напред“, рече лидерот на мнозинството во Сенатот, Чак Шумер.
„Со усвојувањето на овој предлог-закон, Сенатот испраќа порака што секој Американец треба да ја слушне: без разлика кој сте или кого сакате, и вие заслужувате достоинство и еднаков третман според законот.“
Законот доби 61 глас, еден повеќе од потребните 60 за негово донесување. Против беа 36 сенатори. Дванаесет републиканци им се придружија на 49 демократи во поддршката на законот. Еден демократ, Рафаел Ворнок од Џорџија, беше отсутен, како и двајца републикански сенатори.
Сличен, но не идентичен предлог-закон усвоен во Претставничкиот дом на почетокот на годинава со поддршка на 47 републиканци и сите демократи. Претставничкиот дом треба да ја одобри верзијата на Сенатот пред да биде испратена до претседателот Џо Бајден за да биде потпишана како закон.
Во јуни, Врховниот суд го укина правото на абортус, ставајќи крај на половина век од ова право на територијата на целата држава.
Ссудијата на Врховниот суд Кларенс Томас напиша дека судот треба да размисли за поништување на други одлуки кои ги штитат индивидуалните слободи, вклучувајќи ја и пресудата за хомосексуалните бракови од 2015 година.
Околу 568.000 венчани истополови двојки живеат во Соединетите Американски Држави, според Бирото за попис на САД.
