Италијанскиот стратег го фали неговиот играч за кого смета дека наскоро би можел да стане еден од најдобрите напаѓачи на Сатриот континент.
Предводникот на Евертон, Карло Анчелоти, предвидува дека Бразилецот Ришарлисон џи Андраде, бидејќи ги има сите потребни атрибути, наскоро ќе се најде помеѓу водечките напаѓачи во Европа.
„Ришарлисон е модерен напаѓач, комплетен напаѓач, бидејќи тренира навистина напорно. Неговата физичка статистика е многу висока, како на играч од средниот ред, но има брзина и е убиствен во шестнаесетникот“, вели Анчелоти.
„Тој е неверојатен во играта со глава и одлучен пред голманите, а неговото движење со топка е навистина добро“
Ришарлисон во тимот од Ливерпул дојде летото 2018 година од редовите на Вотфорд каде мина само една сезона откако ја напушти татковината каде настапуваше за Флуминенси и Америка Минејру.
„Мислам дека може да биде еден од најдобрите напаѓачи во Европа. Сигурен сум дека го може тоа бидејќи ги има сите потребни квалитети, а згора на тоа нема една посебна позиција на теренот. Тој е навистина комплетен играч“, додава Анчелоти.
Сезонава 23-годишниот Бразилец одигра 21 натпревар во Премиер Лигата, постигна 5 голови и 3 пати асистираше. Постигна по 3 гола во ФА купот и во Лига купот. Претходните две сезони постигнуваше по 13 голови во англиската лига.
„Онаму каде што треба да се поправи е неговата техника. Може ја подобри контролата на топка и сето тоа, но неговото движење без топка е навистина одлично и позиционирањето во шестнаесетникот му е од највисок стандард. Би напредувал играјќи во Лигата на шампионите, тоа би било фантастично искуство“, заврши Италијанецот.
Евертон сезонава се бори за пласман во Лигата на шампионите, но го чека тешка битка до крајот. Моментално го дели 6. место со градскиот ривал Ливерпул со кој имаат по 43 бода, додека последното место кое води во европската елита го држи Вест Хем со два бода повеќе. Вечерва играат на гости кај Вест Бром, а в понеделник ги чека директен дуел со 5-тиот Челси и тоа на гостински терен.