Селекторот и капитенот на македонската фудбалска репрезентација, Игор Ангеловски и Горан Пандев, во пресрет на квалификацискиот натпревар со Шпанија вчера одржаа прес-конференција. Двајцата очекуваат дека Македонија ќе се престави во добро светло, бидејќи самото име на противникот е доволно за максимална мотивација.
Селекцијата која има две европски и една светска титула и која има пет победи во исто толку соочувања со Македонија, в недела гостува во Скопје. Шпанците се фаворити, тие се веројатно меѓу најдобрите четири светски селекции, но Македонија нема намера однапред да се предаде.
„Без разлика на тоа колку противникот е моќен очекувам моите фудбалери да го дадат најдоброто од себе. Мислам дека нема никаква потреба од дополнителна мотивација, доволно е името на противникот. Сметам дека сме подготвени да одговориме на овој предизвик“, рече селекторот Ангеловски.
Доза на оптимизам кај македонските фудбалери влева и изданието против Турција во пријателскиот натпревар, одигран во понеделникот. На тој меч единствено недостасуваа голови. Против Шпанија, која на своите противници не им дозволува да створат многу шанси, напаѓачите (Пандев и Несторовски) ќе мора максимално да ги користат.
„Се надевам дека ќе можеме да ги изненадиме преку контранападите. Нестор е во добра форма, тој е важен играч за нас, се надевам дека ќе постигне гол. Од другата страна најголема закана може да ни биде Давид Силва“, рече капитенот Пандев.
Дуелот ќе се одигра вечерва на „Телеком арена“ во Скопје со почеток во 20 часот и 45 минути.