Англија ќе се соочи со Франција во четвртфиналето на Мундијалот, а најголема закана кон голот на Џордан Пикфорд ќе биде Килјан Мбапе.
Првото име на француската репрезентација е и еден од најдобрите светски фудбалери, а на ова првенство веќе постигна пет гола и намести два.
Англискиот селектор Герет Саутгејт е свесен дека Мбапе е најопасниот поединец во редовите на Франција. Англиските медиуми објавија дека Саутгејт две години се подготвува за мечот против Мбапе, кој знаел дека ќе дојде во одреден момент и дека смислил план како да го спречи.
Како што пишува Independent, Саутгејт и неговите соработници развиле план против Мбапе. Тие се убедени дека најдобриот начин да се запре Мбапе е да му парираат со подеднакво моќен и опасен напаѓач, принудувајќи го да се фокусира повеќе на одбраната отколку на нападот.
Во овој случај тоа треба да биде Фил Фоуден, ѕвездата на Манчестер Сити, а опција е и Маркус Рашфорд од Манчестер Јунајтед. Во случај да биде Рашфорд како десно крило, Фоуден би се преселил на левата страна од нападот на Англија.
