Договорен е најскапиот трансфер во женскиот фудбал досега.
Кира Волш (25) стана најскапата фудбалерка во историјата. Барселона за Англичанката му плати на Манчестер Сити околу 460.000 евра, со што беше поставен нов рекорд кој претходно го држеше Пернил Хардер, за која Челси пред две години плати околу 290.000 евра.
Волш е фудбалерка од средниот ред која го освои овогодинешното Европско првенство со Англија, каде беше прогласена за играч на натпреварот во финалето против Германија (2:1) на Вембли. Во Барселона ќе ѝ се придружи на сонародничката Луси Бронзе, која исто така го напушти клубот од Манчестер и премина во каталонскиот.
По осум години во Сити, за кој дебитираше во 2014 година и забележа 211 настапи и освои осум трофеи, Волш потпиша тригодишен договор со Барселона. За англиската репрезентација одиграла 50 натпревари.
