Апелацискиот суд во Скопје ја уважил жалбата на одбраната за притвор на поранешниот шеф на УБК, Сашо Мијалков, определен во случајот „Плацови на Водно“, и го преиначи првостепеното решение.
Како што потврди и појасни за МИА портпаролот на Апелација, Татјана Дуковска, согласно законот, по ова решение без задршка веднаш треба да биде извршено пуштањето на слобода на Мијалков. Но, како што рече, не мора да биде веднаш реализирана ако има други постапки, за што, подвлече, нема информации.
Решението од второстепениот суд е испратено до Основниот кривичен суд од каде се очекува да биде доставено и до затворот Шуто Оризари каде Мијалков ја издржува мерката притвор.
Сѐ уште нема информации дали вечерва Мијалков ќе замине дома.
Дуковска најави дека утре одлуката и целото образложение ќе биде објавено на веб-страницата на Апелацискиот суд.
– Според решението на Апелациониот суд, жалбата на обвинетиот се прифаќа, а првостепеното решение се преиначува така што притворот спрема обвинетиот се укинува и се наложува истиот веднаш да биде пуштен да се брани од слобода. Решението на второстепниот суд во текот на денов ќе биде експедирано до странките во постапката и КПД Затвор – Скопје, стои во соопштението од Основен кривичен суд Скопје.
На прашањето дали одлучувал истиот состав на Кривичен совет, како и претходно, таа изјави дека Кривичниот совет во судот е еден совет, со тоа што редовните судии имаат и заменици судии кога се спречени да постапуваат.
Инаку, претходно адвокатите на Мијалков поднесоа гаранција во имот вреден 11.106.501 евро дека тој нема да избега, за притворот што претходно го имаше во случајот „Трезор“ и првостепено е осуден на 8 години затвор. Апелација ја прифати гаранцијата и го укина притворот минатата среда, но Обвинителството за гонење организиран криминал и корупција истиот ден побара притвор за случајот „Плацови на Водно“ каде тој е еден од обвинетите.
