Чек дис аут

Аукција на годината: ДНК на светски познатите лидери на продажба

20. февруари 2020 - 16:39 | МИА

Анонимна организација тврди дека земала ДНК примероци од неколку светски лидери и познати личности кои присуствувале на Светскиот економски форум во 2018 година во Давос и се подготвени да ги продадат на аукција.

Групата Ernest Project тврди дека земала предмети и отпадоци што ВИП гостите на големиот собир во Швајцарија ги оставиле зад себе, а на нив се наоѓаат траги од нивниот генетски материјал. На листата се наоѓаат американскиот претседател Доналд Трамп, францускиот претседател Емануел Макрон, германската канцеларка Ангела Меркел, финансиерот Џорџ Сорос и популарниот пејач Елтон Џон.

Таканаречената „колекција Давос“, која содржи салфетки, хартиени чаши, гумички за коса и вилушки, е сортирана и проценета. Цената варира од 1.200 долари за човечка коса до 65.000 долари за чаша вино, меѓутоа во каталогот не се наведува кој предмет чии генетски траги носи.

Аукцијата за предметите беше закажана за 20 февруари во Њујорк, но се одложи поради нерешени правни прашања, истакнаа организаторите.

Не може да се потврди дали овие предмети имаат ДНК траги од најголемите политичари и познати ѕвезди и дали со сигурност аукцијата е вистинска или некој вид перформанс за да се привлече внимание на проблемот со чувствителноста на податоците.

Според тврдењата на Ernest Project, главната цел е покренување на свеста за „капитализмот на контрола“ бидејќи технолошките конгломерати можат да ги соберат најосетливите податоци за корисниците. Организацијата е загрижена дека корпорациите можат да ги злоупотребат генетските податоци што откриваат информации за која било човечка болест, потекло или односи и можат да бидат искористени за уцена. Целта на аукцијата е да се поттикне елитата да делува.

Коментирај