Остатоци од авион што се урнал на швајцарските Алпи во 1968 година, се пронајдени во глечер 54 години подоцна, соопшти полицијата.
Остатоците од авионот се појавија на глечерот Алеч, во југозападниот дел на кантонот Валис, во близина на врвовите Јунгфрау и Менч. Полицијата појасни дека остатоците биле пронајдени во четвртокот.
„Истрагата утврди дека станува збор за делови од Piper Cherokee со регистрација HB-OYL, кој паднал на таа локација на 30 јуни 1968 година. Понатамошната работа ќе биде преземена што е можно поскоро“, се вели во соопштението на полицијата. Локалниот весник 24 Heures објаснува дека во авионот имало учител и лекар и неговиот син, сите од Цирих. Тогаш биле пронајдени нивните тела, но не и остатоците од авионот.
Остатоците биле забележани од водич за планинарење за време на една од обиколките во областа. Поради климатските промени и топењето на глечерите, патеката на искачување е променета така што сега поминува низ делот од планината каде што се наоѓале остатоците.
