Австрија подготвува закон според кој полицијата покрај возачката дозвола, ќе им го одземе и автомобилот на возачите кои значително ја надминуваат дозволената брзина, беше соопштено во Виена.
„На нашите патишта едноставно има премногу луѓе кои не може да бидат убедени, за кои не функционираат казните и дополнителната обука. На овие луѓе мора да им се одземе оружјето“, рече австриската министерка за транспорт Леоноре Гевеслер при претставувањето на нацрт-законот.
За повторени прекршоци, возилото може да биде одземено и продадено на аукција
Предлог-законот значи дека на возачите кои ќе ја надминат дозволената брзина од 60 километри на час во населено место или 70 километри на час надвор од населено место ќе им биде одземен автомобилот на лице место две недели.
Во овој период треба да се провери дали се работи за возач кој веќе е евидентиран за брзо возење. Доколку се покаже дека возачот веќе направил драстично прекршување на брзината, неговиот автомобил би можело да се продаде на аукција.
Во случај на надминување на дозволената брзина од 80 километри на час во населено место или 90 километри на час надвор од населбата, автомобилот веднаш би бил одземен и продаден. Ова би се однесувало, на пример, за оние возачи кои се фатени со брзина од 220 км/час на автопатот во Австрија, каде максималната брзина е 130 км/час
Законот би можело да стапи на сила следната година
Министерката Гевеслер рече дека овие мерки служат за зголемување на безбедноста во сообраќајот.
„Со тие брзини за кои зборуваме, ниту еден возач веќе нема целосна контрола над својот автомобил“, нагласи таа.
Властите во Австрија годишно бележат од 400 до 450 случаи во кои може да се примени новиот закон. Законот би можело да стапи на сила кон средината на следната година.
