Алан Мерил, автор на хитот „I Love Rock’n’Roll“ почина на 69-годишна возраст во Њујорк, откако се заразил од коронавирусната инфекција COVID-19, соопшти неговата ќерка Лора Мерил.
Според неа, татко ѝ пред две недели ѝ јавил дека заболел од настинка. Во разговорите со ќерка му тој укажувал дека не е сериозно и дека е обична настинка. Алан Мерил починал претпладнето на 29 март.
- Коронавирусот го однесе татко ми ова утро. Ми дадоа само две минути да се збогувам пред да ме изнесат, напиша Лора на Facebook.
Во својот пост таа напиша дека не можела да присуствува на неговиот погреб поради тоа што мора да помине карантин од две недели. Ги повика сите да бидат сериозни со пандемијата на коронавирус и да останат дома.
Алан Мерил беше познат како вокалист и бас-гитарист на британската поп-рок група „Arrows“. Песната „I Love Rock’n’Roll“ групата ја сними во 1975 година, а била напишана од Мерил и гитаристот Џејк Хукер.
Песната беше препеана од повеќе познати изведувачи. Најпознатиот препев е снимен во 1982 година во исполнување на пеачката Џоан Џет, по што пасната стана светски хит.
