Ниту Левандовски, ниту Холанд, Дер Класикер го реши Јошуа Кимих со одличен лоб удар.
Баерн е на чекор од јубилејната 30-та титула откако ги освои трите бода на најтешкото гостување, кај големиот рувал Борусија во Дортмунд.
Домаќините од почеток тргнаа во офанзива и Ерлинг Холанд за малку не донесе рано водство кога ја протна топката низ нозете на Мануел Нојер, но од самата гол-линија чист гол спаси Жером Боатенг.
Кратко потоа Рафаел Герејру ја затресе гостинската мрежа, но офсајдот беше очигледен и голот поништен.
Првата шанса за Баерн дојде во 20. минута кога Серж Њабри упати одличен удар, но од гол-линијата исфрли Матс Хумелс.
На само две минути пред паузата беше постогнат голот кој се покажа решавачки. Јошуа Кимих прими една топка на работ од шестнаесетникот и без многу размислување упати лоб удар откако примети дека домашниот голман Роман Бирки е малку подизлезен.
Во вториот дел прво Леон Горецка пропушти шанса да го зголеми водството, а кратко потоа Холанд на спротивната страна не успеа да израмни.
Борусија продолжи да притиска, а Баерн на контри се закануваше. При една таква прилика Левандовски ја погоди стативата.
Во 126. дерби натпревар Баерн ја забележа победата број 60 и сега разликата на табелата ја зголеми на +7 во однос на Борусија со што практично е на чекор од титулата.