Италијанскиот фудбалер Марио Балотели со емотивна порака се прости од менаџерот Мино Рајола, откако официјално беше потврдена смртта на еден од најпознатите агенти во светот на фудбалот.
Рајола почина вчера во болница во Милано, а многу фудбалери и спортски работници се простија од него, со порака дека станува збор за човек кој секојдневно се трудел на клиентите да им обезбеди најдобри услови.
Балотели и Рајола почнаа со соработка, во 2010 година кога агентот му помогна да го реализира трансферот во Манчестер Сити, а потоа во Милан, Ливерпул и Ница.
„Засекогаш ќе бидеш со мене во мојот живот и во фудбалот. Твоите критики, помош, совети, шеги и стратегии засекогаш ќе ми останат во сеќавање. Те сакам и засекогаш ќе те сакам како втор татко и знам дека таму горе секогаш ќе биде присутен во нашите животи. Среќен пат, Мино“, напиша Балотели.
Објавата на Балотели за брзо време собра над 130.000 реакции на Instagram.
Во текот на менаџерската кариера, Рајола склопи договори за повеќе од 847.7 милиони долари и наплаќаше провизија за секој трансфер на играч од скоро 10 проценти. Зборуваше 7 јазици – италијански, англиски, германски, шпански, француски, португалски и холандски.
