Играчот од средниот ред на Интер со големи пофалби до својот корпулентен соиграч, како за играта на терен, така и за неговиот карактер.
Никола Барела веќе две години е соиграч со Ромелу Лукаку во Интер. Двајцата дојдоа во клубот во исто време, летото 2019 година, со тоа што Барела дојде на почетокот од јули, а Лукаку месец дена подоцна.
„Лукаку е како Шекил О'Нил: никој на тренинг не може да го запре, потребни се тројца за да се сопре“, вели Барела во интервју за DAZN опишувајќи го белгискиот џин.
Сепак, можеби Лукаку е огромен, но не бадијала сите го викаат „нежниот џин“.
„Тој успева да најде убав збор за сите, има добар однос со сите, а потоа на терен е одлучен како никој друг. Кога пристигна беше неверојатен: веднаш почна да зборува италијански! Сепак, сигурно било лесно за него бидејќи ги знае сите светски јазици. Неверојатен е“, додава играчот од средниот ред.
Белгиецот со потекло од Конго е вистински полиглот - тој зборува холандски, свахили, француски, англиски, португалски, шпански, сега научи и италијански, а разбира и германски иако не го зборува.
