Средбата од седмото коло на шпанската Ла лига меѓу Барселона и Лас Палмас се игра без присуство на навивачи на Ноу камп.
Денеска во Каталонија се одржува референдум за независност, а на улиците има судири меѓу полицијата и граѓаните кои излегоа да гласаат на референдумот што власта во Мадрид го смета за противуставен.
Играчите на Барселона поради тоа одбија да го играат денешниот меч, но на крај решија да излезат на терен.
Барса пред еден час соопшти дека од безбедносни причини нема да го игра натпреварот. Каталонскиот клуб е навреден од одлуката на водството на Лас Пламас да ја поддржат власта во Мадрид и да стават шпанско знаме на дресовите, а тоа беше и првата причина зошто одбиваше да се игра натпреварот.
Ла лига и Фудбалскиот сојуз на Шпанија го одбија барањето на Барселона да се одложи натпреварот, а играчите на Лас Палмас излегоа да се загреваат.
По долги преговори, Барселона одлучи да го игра натпреварот под закани за жестоки казни, но без присуство на навивачи, со оглед на тоа дека една навивачка група се закани дека ќе прави нереди и ќе ја прекине средбата.
