Дали конечно Бејл е назад во форма? Синоќа двапати го тресна Кристал Палас откако пред три кола истото му го маправи и на Барнли. Но, има среќа што до него играа Кејн и Сон.
Гарет Бејл сега има постигнато 6 голови на последните 6 натпревари. Се чини си ја врати формата откако сезонава постигна само 4 голови на првите 16 натпревари откако се врати во Тотенхем.
Синоќа неговиот тим го пречека Кристал Палас во локално лондонско дерби помеѓу клубовите год јужниот и северниот дел на англиската метропола.
Во 25-тата и 49-тата минута Бејл постигна голови и тоа по две асистенции од Хари Кејн. Одигра до 70-тата минута коа беше заменет од Ерик Ламела.
„Ова е она за кое дојдов тука, видејќи офанзивните играчи кои ги имаме се неверојатни. Не само оние кои играа, туку и тие на клупата“, вели велшката ѕвезда во изјава за Sky Sports.
„Сите се поттикнуваме еден со друг, убаво е што ги освоивме трите бода. Има голема борба за место на терен, па мора да држите форма и да работите напорно“.
Бејл врза 7 натпревари по ред на кои е на терен, без разлика од првата минута или од клупата. На последните три, вклучувајќи го и вчерашниот, беше во почетните 11.
„Се наоѓаме во добар моментум, ја вративме самодовербата, па се надевам ќе продолжиме така. Се чувствувам добро, понекогаш едноставно потребно е време, но доволно сум искусен за да бидам трпелив“, додава.
Бејл не штедеше зборови за да го пофали соиграчот Хари Кејн кој му асистираше за двата гола пред и сам да погоди двапати за конечни 4:1.
„Тој е фантастичен, неверојатен напаѓач. Сега повторно го покажа тоа, а воедно е и конзистентен. Беше фантастична претстава од негова страна и навистина сме среќни што го имаме во тимот“, заврши Велшанецот. Претходно кога даде два гола, против Барнли, двоен асистент му беше Сон Хјон-мин.
Тотенхем по 28 кола во Премиер лигата е шести со 45 бодови.