Дефанзивецот на Бенфика го одигра најлошиот натпревар во историјата на Лигата на шампионите, губејќи ја топката дури 31 пат.
Чешкиот лев бек Давид Јурашек синоќа испиша историја во Лигата на шампионите, но за негова несреќа ќе остане запаметен во негативна смисла.
Јурашек летоска пристигна од прашка Славија во Бенфика за 14 милиони евра, а синоќа на натпреварот од Лигата на шампионите против Реал Сосиедад постави негативен рекорд во тоа натпреварување.
Шпанскиот тим по половина час веќе водеше со 3:0, а тренерот на Бенфика, Рогер Шмит во игра го внесе Јурашек за да ја подобри играта на својот тим.
Сепак, 23-годишниот Чех одигра катастрофално, па за еден час на теренот успеа да ја загуби топката дури 31 пат, што никому не му се случило во историјата на Лигата на шампионите ниту за 90 минути.
Тој ја допре топката 59 пати, што значи дека повеќе од половина од времето кога ја имал топката во своите нозе погрешил и дефинитивно ќе сака што побрзо да ја заборави ноќта во Сан Себастијан.
