Фудбалерите на Борусија од Дортмунд ќе бидат ослабени во првиот четвртфинален натпревар од Лигата на шампионите против Атлетико, бидејќи името на најдобриот стрелец на клубот, Дониел Мален, не се најде на списокот на патници за Мадрид.
„За жал, тој нема да биде со нас“, изјави спортскиот директор на Борусија, Зебастиан Кел денеска пред тимот да замине за Мадрид, каде в среда ќе се одигра првиот четвртфинален натпревар.
Поради повреда на мускулот Мален ги пропушти последните два натпревара во Бундеслигата, против Баерн и Штутгарт. Мален се израмни на првото место меѓу стрелците на тимот од Дортмунд оваа сезона со Никлас Филкруг. Двајцата досега постигнаа по 13 голови. Од тие 13, 25-годишниот репрезентативец на Холандија има 11 во Бундеслигата и по 1 во Лигата на шампионите и ДФБ купот. Има и 5 асистенции.
Борусија ќе се обиде да се пласира во полуфиналето на Лигата на шампионите за првпат по сезоната 2012/2013, кога тимот стигна и до финалето каде беше поразен од Баерн.
„Со нетрпение ја очекуваме таа задача“, додаде Кел.
Натпреварот Атлетико - Борусија се игра утре од 21 часот на „Метрополитано“ стадионот во Мадрид под силно полициско обезбедување по заканите за терористички напади од страна на ИСИС.