Пријателскиот натпревар меѓу Шпанија и Бразил, на „Сантјаго Бернабеу“ во Мадрид, беше сѐ само не пријателски. Португалецот Антониу Нобре е „заслужен“ за нервозата која владееше на теренот, особено меѓу Бразилците.
Натпреварот во Мадрид заврши без победник 3:3. Навивачите на „Сантјаго Бернабеу“ можеа да ја видат магијата на Дани Олмо и голот на новиот бразилски вундеркинд Ендрик.
Спорни се пеналите кои Нобре ги досуди за Шпанија во 12. и 87. минута.
Лут поради она што се случуваше на теренот во Мадрид, претседателот на Бразилската фудбалска конфедерација (ЦБФ), Едналду Родригис, најави дека официјално ќе ја извести ФИФА дека репрезентацијата на петкратниот светски првак повеќе нема да игра пријателски натпревари на кои нема видео технологија.
„ЦБФ ќе ја извести ФИФА дека не само на официјалните натпревари на бразилската репрезентација, туку и на пријателските, употребата на ВАР мора да биде задолжителна. Фудбалот многу напредуваше, вакви работи се недозволиви во еден ваков важен натпревар“, изјави Родригис.
