Летувањето во странство годинава е игра на погодување и неизвесност, а не одмор.
Британските туристи кои најдоцна од вчера заминале на летување во Шпанија се шокирани и збунети од ненадејната одлука на нивната Влада која синоќа одлучи да им биде одреден карантин од 14 дена откако ќе се вратат во земјата.
Британската Влада синоќа ја тргна Шпанија од листата на земји каде е безбедно да се патува, по огромниот пораст на новозаразени со COVID-19 во изминатите денови.
На патниците кои доаѓаат од оваа земја им беше кажано дека може да избегнат карантин од 14 дена само ако се вратат во Велика Британија до 23 часот, по локално време.
Оваа мерка ќе нанесе огромен удар врз шпанскиот туризам кој се обидува да спаси дел од сезоната по големите загуби поради рестриктивните мерки воведени за спречување на ширењето на коронавирусот.
Шпанија е популарна дестинација за британските туристи. Само лани 18,08 милиони Британци летувале во оваа земја.
