Цените на нафтата минатата недела паднаа на најниско ниво на глобалните пазари, четврти пат по ред, бидејќи централните банки подигнуваат каматни стапни поради високата инфлација, што би можело да предизвика рецесија, а со тоа и пад на побарувачката на црното злато.
Цената за барел на лондонската берза минатата недела се лизна за 5,7% на 85,15 долари, додека на американската берза барелот поевтини за 7,5%, на 78,75 долари.
Падот на цените на најниско ниво од средината на јануари е последица на успорувањето на растот на најголемите светски економии и сѐ поголемиот ризик од рецесија. Поради високата инфлација, централните банки ги зголемуваат каматните стапки, што го забавува економскиот раст и со тоа ја ослабува побарувачката за енергенси.
Минатата недела американската и швајцарската централна банка ги подигнаа клучните каматни стапки за 0,75 процентни поени, а британската и норвешката централна банка за половина поен.
Трговците стравуваат дека повисоките трошоци на задолжување ќе го пригуши економскиот раст и ќе предизвика рецесија, а нивните стравувања ги поддржа и истражувањето на S&P Global од петокот, кое трет месец по ред покажува пад на PMI деловната активност на еврозоната во септември.
„Рецесија во еврозоната е многу веројатна“, заклучува економистот на S&P Global, Крис Вилијамсон. Како резултат на тоа, цените на нафтата во петокот паднаа и за околу 5%.
„Слабите европски PMI индекси, загриженоста за растот поради агресивново заострување на монетарната политика во САД и Европа влијае на ризичните средства. Ниту цените на нафтата не се имуни на овие стравувања поврзани со растот“, објаснува Џовани Стауново од швајцарската банка UBS.
Силниот долар исто така негативно влијае на цената на нафтата. Индексот на доларот, кој покажува подигнување на вредноста во однос на останатите шест најважни светски валути, минатата недела порасна за 3% и достигна ново највисоко ниво во последните 20 години. А, поскапувањето на нафтата за купувачите во други валути негативно влијае на побарувачката.
„Стравот од рецесија, честото зголемување на каматните стапки од страна на централните банки и силината на доларот ги надминаа геополитичките тензии“, вели Тамаш Варга од PVM Oil Associates.