Раководството на Челзи никогаш не покажувало знаци на целосна стабилност, но овојпат изгледа конфузно, збунето и неорганизирано. Клубот уште не може да одлучи дали да го задржи Антонио Конте, но тоа не е најголемиот проблем во нивните раце.
Поранешниот извршен директор на Челзи, Тревор Бирч, ја истакна неговата загриженост за сето она што се случува со клубот во последната година.
Додека сопственикот на Челзи, Роман Абрамович, пробува да си ја обнови британската виза, тој ја стопираше изградбата на новиот стадион и го стави под знак прашалник новиот дом на клубот, кој треба да има 60.000 седишта, 20.000 повеќе од досегашниот капацитет на нивниот стадион.
Како тоа да не беше доволно, тие ризикуваат да го загубат Конте без притоа да најдат кандидат за негова замена. До минатата недела се шпекулираше името на Маурицио Сари, но сега и тие гласини се стишија. Макс Алегри веќе одби да се пресели во Англија, додека Челзи не е подготвен да му ја понуди на Луис Енрике платата која Шпанецот ја бара. Поради сите овие проблеми Тревор Бирч смета дека интегритетот на Челзи е загрозен, а тоа би можело да резултира и во заминување на нивниот најдобар играч.
„Навивачите на Челзи сега ризикуваат да останат без стадион, без тренер и без нивниот најдобар играч. Верувам дека Еден Хазард ќе побара трансфер во Реал Мадрид“, вели Бирч.
Гласините за евентуалниот премин на Хазард во Реал Мадрид траат веќе неколку години, а секоја година се зголемува шансата тој навистина да го облече дресот на „кралскиот клуб“. Доколку Кристијано Роналдо го напушти клубот, тогаш Еден Хазард ќе биде прва мета на актуелниот европски шампион.
„Ова е многу вреден клуб, разбирам зошто Абрамович сака да го задржи. Но, за да ја задржи вредноста мора и да инвестира во нови играчи – а оваа сезона не го направи тоа правилно“, додава Бирч.
Челзи наредната сезона нема да игра во Лигата на шампионите, туку во Европа лигата, па може да се очекува некои од главните ѕвезди да го напуштат клубот.