Лос Анџелес, 18 април 2018 (МИА) - Човек вооружен со нож, јажe, црна маска и ракавици викендов бил уапсен додека се обидувал да влезе во домот на поп-пејачката Тејлор Свифт во Лос Анџелес.
Во автомобилот на натрапникот по име Џулиус Александер Сандрок полицијата нашла уште маски, празна футрола за пиштол, муниција и антидепресиви. Надлежните се сомневаат дека тој веќе некое време ја следел пејачката, објави весникот „Дејли Меил“.
На уапсениот 38-годишен натрапник му е одреден притвор со кауција од 150.000 долари. Свифт не била во својот дом кога се случил немилиот настан. Инцидентот доаѓа една недела откако друг човек е обиде да се прекачи преку ѕидот околу нејзината куќа во Беверли Хилс, а човек од Конектикат ограби банка и ги фрли парите во дворот на палата што Свифт ја има на атланскиот брег на САД.
