На животните во зоолошките градини им е доволно тешко бидејќи немаат слобода, па недостасува уште некој да се „шегува“ со нив, а изгледа на некои од нив не им се седи мирно додека им се случува такво нешто.
На интернет кружи вознемирувачко видео на кое се гледа како лав одговара на „провокациите“ на чувар од зоолошката градина од Јамајка и му го откинува прстот.
Имено, чуварот ја турнал раката во металниот кафез, провоцирајќи го животното, а на видеото се гледа како ги допира забите и го штипка по образите. Лавот, кој во еден момент очигледно се уморил од „играњето“ со него, го зграпчува за рака чуварот, кој веднаш вреснува.
Следните неколку секунди чуварот се турка со сите сили за да се обиде да ја извади раката од вилицата на животното, а зад него има посетители кои го снимаат целиот настан.
Видеото се појави на YouTube каналот наречен Jamaica Observer и веќе е прегледано десетици илјади пати, а под него гледачите се прашуваат зошто чуварот воопшто решил да пика рака каде што не треба.
„Заклучувањето на животните само за луѓето да можат да гледаат и да се забавуваат е доволно лошо, а исмевањето на животните без причина е повеќе од сурово. Лавот овде е вистинската жртва“, се вели во еден коментар.
Друг напиша: „Не знам што повеќе ми пречи - фактот што тој продолжува да си игра со лавот приближувајќи ја раката до устата или фактот дека тие луѓе стоеја совршено мирно и го снимија целиот настан“.
Од управата на оваа зоолошката градина се огласија соопштувајќи дека се работи за „несреќа што никогаш не требала да се случи“.
„Постапките што ги покажа вработениот во зоолошката градина на Јамајка се трагични и не претставуваат политика што треба постојано да се следи во овој објект. Во моментов го прегледуваме видеото за да спречиме ова да се повтори. Тоа беше немил настан што никогаш не требаше да се случи. Се надеваме дека ќе продолжите да нѐ поддржувате“, напишаа тие.
