Грчкиот тенисер Стефанос Циципас (23) смета дека не би било лошо и тенисерките да играат на три освоени сета на Грен слем турнирите, а оваа негова изјава крена прашина во тенискиот свет.
Имено, новинарите го прашаа Циципаша дали повеќе сака да игра во два или три освоени сета, а тој прво се осврна на тоа дека мажите играат во повеќе освоени сетови во однос на жените на четирите најголеми турнири, додека наградниот фонд е целосно изедначен.
„Не би сакал да звучам контроверзно. Тука е и она околу еднаквите плати. Жените добиваат иста сума пари како и мажите, иако играат во два добиени сета. Има многу научници и статистичари кои велат дека жените се поподготвени и поиздржливи од мажите. Не знам, можеби тогаш би можеле да одиграат и пет сета“, рече Циципас.
Гркот додаде дека му се допаѓа форматот на три освоени сета на Грен слемовите, но додаде дека намалувањето на два ќе донесе промени во светот на тенисот.
„Би можеле да видиме поголема варијација кога станува збор за шампионите на Грен слем ако играме на два добиени сета. Навистина верувам во тоа, би имало многу различни шампиони. Александар Зверев би го освоил УС Опен, јас Ролан Гарос. Тоа е сосема поинаква психологија. Некои поискусни играчи полесно би се враќале во форма. Кога се игра на три добиени сета, во сила е друга психологија. Овој формат им овозможува на големите играчи, поискусните, да го возвратата ударот. Сепак, ми се допаѓа тој формат“, рече Гркот.
Циципас моментално е на АТП турнирот во Мајами каде се пласираше во осминафиналето. Таму ќе игра против Австралиецот Алекс Де Минаур.