Претседателот на Франција, Емануел Макрон, денеска го поздрави хуманитарното примирје на кое се согласија Ерменија и Азербејџан, објави Елисејската палата.
Се наведува дека примирјето е склучено „по француското посредување во текот на претходните денови во координација со копретседавачите на Минската група“.
Ереван и Баку вчера соопштија дека се договориле за хуманитарно примирје кое стапи на сила на полноќ.
„Овој прекин на огнот треба да биде безусловен и строго да го почитуваат обете страни. Франција внимателно ќе ја следи ситуацијата и ќе остане ангажирана така што непријателствата трајно да престанат и наскоро да започнат веродостојни разговори“, соопшти кабинетот на Макрон.
Денес, Макрон неколкупати телефонски разговарал со ерменскиот премиер Никола Пашинијан и претседателот на Азербејџан Илхам Алиев.
Претходниот договор за примирје, постигнат во Москва минатата недела, не се реализираше и го обележаа постојани кршења со престрелки и гранатирања, дури и на цивилни области.
Одбранбените единици на ерменската армија наводно уништиле четири непријателски тенкови на југ од зоната на конфликтот во Нагорно-Карабах.
Според портпаролката на ерменската армија, Шушан Степанјан, Азербејџан користел голем број беспилотни летала и артилериски системи.
Таа изјави дека Азербејџан го прекрши новото примирје склучено синоќа.
Според ерменски извори, има жртви и ранети од обете страни.